租務資訊 · Renting Guide
由搵盤、睇樓、簽代理協議、簽臨時租約、簽正式租約，到交鎖匙入伙——完整流程一頁睇晒，連查冊、印花稅等注意事項同常見陷阱都幫你整理好。
透過地產代理、網上放盤平台或親友介紹搵合適單位，留意屋苑、交通、校網等基本條件是否符合需求。
親身睇樓好重要：留意座向、景觀、單位實際狀況、傢俬電器新舊、屋苑管理及配套設施。亦要問清楚管理費、差餉及地租由邊一方負責——近十幾至二十年樓齡嘅單位，租金一般較常已包括呢啲費用；但亦有部分業主會分開收取。如因單位有租客居住、身處外地或其他情況未能親身睇樓，記得仔細睇相片同影片，亦要留意樓齡。實務上，亦有租客未睇樓直接簽約，或者睇完樓後好快決定簽約。
委託代理搵盤，須簽署訂明表格 6（地產代理協議—承租）。根據常規做法，代理代表租客時最遲要喺「安排睇樓之前」或「簽租賃協議之前」（以較早者為準）簽妥呢份文件——即係話正式嚟講應該喺睇樓前已經簽咗，唔係坊間講嘅「有效期三個月」咁簡單。留意如果透過唔同代理接觸同一單位，有機會要負擔多於一份佣金，簽約前宜問清楚。
雙方同意租樓後簽臨時租約，租客須支付臨時訂金（一般為一個月租金），呢份文件已經具法律效力。落任何訂或簽臨時租約前，建議先完成基本業權查冊（見下）。
通常喺簽臨約後 14 日內簽署，訂明雙方責任、租期、加租安排等細節。如雙方直接簽正式租約而未有簽臨時租約，則一切按正式租約條款處理。常見安排係「一年生約、一年死約」——死約期內業主唔可以單方面加租，租客亦唔可以提早退租（實際條款以雙方協議為準）。
支付按金（一般兩個月租金）、首月租金及印花稅，驗收單位狀況（傢電是否正常運作、有否破損），確認後領取鑰匙。盡量約業主一齊面對面驗收；如業主未能出席，可睇吓會唔會由代理協助驗收，大家一齊睇清楚，以防日後拗撬。建議喺交吉入伙當日拍照及錄影保存單位狀況，再透過 WhatsApp 等通訊方式發一份俾業主，作為雙方確認交收狀況嘅紀錄。
入伙前一般要準備大約 三個月租金金額嘅現金流，包括：
建議用銀行轉帳或 FPS 交租，保留付款紀錄，並保存租金及按金收據；如以現金交租，應要求業主提供書面確認。
香港住宅租約最常見以 兩年為期，俗稱「一年生約、一年死約」——首年為「死約」，租客同業主雙方都唔可以單方面終止合約；第二年為「生約」，任何一方持一至兩個月通知期即可提早終止。呢個安排並非法定要求，實際年期同生死約比例都可以同業主商議，不過市場上比較多業主接受「一年生約、一年死約」呢個做法，屬於相對常見嘅慣例。
實務上留意，「一年死約」嘅實際計法各盤唔同——有機會係 11 個月死約另加 1 個月或 2 個月通知期，亦有機會係 12 個月死約另加 1 個月或 2 個月通知期，兩者嘅實際鎖死年期同細節都有分別。簽臨時租約或者正式租約嗰陣，務必同業主／代理確認清楚實際計法，唔好見到「一年死約」呢個講法就假設晒細節一樣。
如果租客或業主喺簽署臨時租約後取消交易，市場慣常安排如下：
如喺生約期退租，一般須按租約提早一至兩個月通知業主；如未能符合通知期，有機會需要按租約支付代通知金。實際通知期、退租安排及按金退還一律以正式租約條款為準。
業主為咗評估租客嘅還款能力，通常會要求出示收入證明（例如糧單、僱傭合約、稅單等）。如果租客未能提供收入證明（例如自僱人士、現金出糧或者剛轉工未有出糧紀錄），業主有機會要求租客一次性預繳全年租金（12 個月）連同按金，作為冇收入證明情況下嘅替代擔保安排，減低業主嘅收租風險。實際要求因業主而異，租客宜及早準備相關文件，或者提早同代理傾清楚可行方案。
落任何訂或簽臨時租約前，建議透過土地註冊處嘅綜合註冊資訊系統（IRIS）查閱物業嘅業權紀錄，確認：
租約須喺簽署後 30 日內加蓋印花，法例上業主同租客對繳交印花稅負有連帶責任，實務上通常由雙方喺租約條款內自行協議分擔（好多時各半）。可親身到啟德協調道5號稅務中心1樓印花稅署辦理，或者使用稅務局網上電子印花服務。詳細稅率及計算方法可以參考本站印花稅專頁，入面有齊租約印花稅嘅完整稅率表。
香港法律層面對「凶宅」並冇清晰定義，亦冇官方登記制度。如有疑慮，可以直接向業主、代理或大廈保安查詢單位過往有否發生非自然死亡等事件；地產代理如知悉相關資訊，按執業規定應如實申報。
香港養寵物，可能決定你租唔租到樓
唔少業主放盤都寫明「不准養寵物」，養緊或者打算養寵物嘅租客，搵樓、傾租約嗰陣要特別留意。主動喺租約度加返一條寵物條款（講清楚品種、數量，承諾定期清潔同負責任何損壞賠償），會令業主更加放心，有機會令一單本來唔考慮嘅盤都傾得成。
坦白講，養寵物嘅話平時搵樓真係會蝕底啲、明顯難搵——如果環境許可，其實自己買層樓養會舒服好多，唔使成日睇業主面色；不過都要留意返屋苑本身有冇養寵物嘅政策同限制。
詳細做法睇埋我呢條片 👉 香港養寵物，可能決定你租唔租到樓
陳鴻偉 Henry Chan